QUERO

Quero bicarte, tocarte; sentir a túa pel núa baixo os meus dedos, famentos de ti.

Quero rozar os teus pés cos meus, baixo as sabas; recorrer coa punta de lingua o teu lombo, pousar os meus beizos nos teus ollos pechados.

Quero acompasar a miña respiración coa túa, sincronizar os nosos corazóns; erguerme cheirando a ti, compartir o aire, compartir o tempo.

Quero perderme no teu abrazo e naufragar nos teus ollos; quero verte durmir en silencio, acariñándote con coidado.

Quero que a lareira do amor queza amodo os nosos corpos mornos.

Quero facer unha expedición ata o máis profundo da túa mente, internarme no máis recóndito do teu corazón e deixar alí a miña lembranza.

Quero escoitar a túa risa, quero escoitar a miña.

Quero...te, a ti.